Cargando...
1 .Mbói chini
Oje'e chupe mbói chini oguerekógui ombohyapúva huguáipe. Kóa ko mbói oguereko veneno neurotóxico ipochy jave. Tuicha ipara sa'yju, hungy ha morotĩ. Ikatu ipuku 1m. 50 cm. avei, jararáicha. Ko mbói ndaijapysái ha upe rangue ohecha porãiterei.
Hembi'u: guyra, jatyta, teju ha tapiti. Ñandesu'úramo ikatu ñandejuka.
2. Ñandurire
Kóa ko mbói michĩ ha mbyky, Ikatu ohupyty 60 cm. rupi. Sapy'ánte ikatu najahechái oiha ñana pa'ũme. Ipire ipara hungy ha morotĩ. Ñandurire ndoguerekói veneno.
Hembi'u: Jatyta.
3. Jarara
Mbói akã kurusu. Jarara ipoguasu, ipara marrón, hũ ha morotĩ, ipukukuaa 1m. 50 cm. rupi. Oguereko veveno ha ñandesu'uramo ikatu ñandejuka.
Hembi'u: Ho'u apere'a.
4. Kuriju
Tuichaiterei ha ipoguasu. Pe ipire hesa'yju, ipara hungy ha overa kuarahýpe. Ipuku ko mymba ha ohopytykuaa 4m. rupi. Ko mymba Ovy'a y rembeýre ha ýpe o'ytakuaa.
Hembi'u: Ho'ukuaa anguja, apere'a, guyra, vakara'y, pira ha kururu. Ko mbói ndoguerekói veneno.
Kuriju chyryry, ikatu ja'u ñande yvypóra, jaipire'o ha ñamopotĩ porãva'erã hyepy ha ñambojy. Ñande ypykuéra ho'ukuaami.
5. Oime mbói hovy, ijape sỹi, ikatu ipuku 4m. rupi, huguái po'i ha ndoguerekói veneno.
Hembi'u : ju'i, ambere ha anguja.
Ñanerembiaporã
1. Ñamongorami ñe'ẽ oĩ porãva
a. Mbói oguerekóva veneno.
- kuriju
- ñandurire
- Jarara
- mbói chini
b. Mbói ho'ytakuaáva
- mbói hovy
- kuriju
- ñandurire
- jarara
2. Ñambojoaju
3. Jahekami mbói ra'anga, revista, diccinario ha internet -pe , ha jajapo ficha ñamombe'uhápe jajuhúva he'íva hese: Mba'éichapa heñóĩ, moõpa oiko, mba'épa ho'u, oguerekópa veneno.
Fuentes
Santa Cruz, Edelira; Félix de Guarania. (2002)Momarandu, Santillana .Paraguay
Recuperado de:
http://redescolar.ilce.edu.mx/redescolar/publicaciones/publi_reinos/fauna/vibora_cascabel/vibora_cascabel.htm